Rabi Pirzada rishta-e-azdawaj mein munasilik, viral post ki haqeeqat kya?

Also Read

Pakistan ki maroof khattat aur sabaqa pop gulukara Rabi Pirzada ki taza tareen post dekh kar fans unki shadi se mutaliq kashmakash mein mubtala hogaye.

Chand baras qabal, naji videos viral hone ke baad Rabi Pirzada ne showbiz ki duniya ko khairbad keh kar deen ki jaanib raghib hone ka elan kiya tha, baad azaan woh khattat ban gain aur munfarid funparay takhleeq karne shuru kar diye.

Ilawa azeen ab woh ‘Haya by Rabi’ ke naam se ek outlet bhi chala rahi hain jahan munfarid aur khoobsurat mablusat ki farokht ki jati hai.

Kya Rabi Pirzada ne shadi kar li?

Haal hi mein, Rabi ne photo aur video sharing app Instagram par ek post share ki jisme unhein kisi shakhs ke kandhe par hath rakhe dekha gaya, jabke is dauran Rabi Pirzada chehra chupaye us shakhs ko dekh kar muskara bhi rahi thin.

Post share karte huye Rabi ne mabham caption bhi likha jis ke baad unki shadi se mutaliq fans mein qiyas arayian jari hogain.

Sabaqa gulukara ne fans ko kashmakash mein mubtala karte huye likha:

"Alhamdulillah! Har aurat ke liye ek mukhlis mard ka kandha bohot zaroori hai!"

Agarche is post mein mazeed tafseelat shamil nahi thin, lekin mabham caption par mabni is post ko dekhne ke baad users ki jaanib se ye khayal pesh kiya gaya ke Rabi ne aakhir kar apna humsafar talash kar liya hai. Sath hi comment section mein users ki taraf se Rabi ko mukhlis shakhs mil jane par mubarakbad bhi di ja rahi thi.

Shadi se mutaliq qiyas arayion ki haqeeqat kya?

Abhi users isi kashmakash mein mubtala hi the ke Rabi Pirzada ne post ki haqeeqat batate huye mazeed ek aur post share kar di.

Mazkoorah post mein Rabi ke saath khara shakhs haqeeqat mein nahi balki ek dummy tha jo Haya by Rabi ke navy blue traditional shalwar qameez ki numaish ke liye istemal kiya gaya tha. Sath hi Rabi ne apne is shahkar ko kharidne ke khwahishmand fans ki asani ke liye phone numbers ke saath website ka link bhi share kar diya.

Users ka rad-e-amal:

Dusri jaanib, Rabi ki post ki haqeeqat ashaar hone ke baad users qahqaha lagane par majboor hogaye.

Ek user ne comment section ka rukh karte huye likha:

"To asal mein kandha ye tha, main kuch aur hi samajh raha tha."

Ek aur user ne likha:

"Ye tha woh mukhlis shakhs, main samjha ke aap ne shadi kar li."

Sath hi, dusre users ke tabsera bhi hairan kun the.

Read More:
Vikrant ke retirement ki wajah kya? Sanjay Gupta ne raaz faash kar diya.
Aditi Rao ne shadi ke liye 'tareekhi qile' ka hi intikhab kyun kiya?
Crédit :- BBC.COM/URDU