Vegan ghiza kya hai aur budhappe mein iska istemal sehat ke liye kaisa hai?

Also Read

Ek waqt ke khane mein ek shakhs ke liye kitna gosht hona chahiye yeh hamesha ek bara sawal hota hai. Jahan kuch log aksar vegan food ki tarif karte hain, wahan kuch aise bhi hain jo is ke bare mein mohtaat rawaiye rakhte hain.

Yahan sab se pehle yeh wazeh kar doon ke vegan ghiza kya hai? Vegan diet ka matlab hai ke aap sabzi khor ho gaye hain, yahan tak ke aap ne doodh, dahi, ghee, makkhan, lassi, cream aur paneer bhi tark kar diya hai. Is mein shahed bhi chhodna parta hai.

Yeh bhi behas ka mozu raha hai ke kya sabzi khori tamam logon ke liye aur khas taur par buzurgon ke liye ek sehat bakhsh ghiza hai.

BMJ Medicine General mein haal hi mein shaya hone wali ek mutanaaza tahqiqat mein hayati umar barhne ke mamlay mein sabzi wali ghiza ke mumkinah faiday par roshni daali gayi hai jo boodha hone ke amal ko mumkinah tor par sust kar deti hai.

Bohat se mutaalay mein mukhtalif khuraakon ke asraat ko dekhte hue kuch maahireen ne unke nataij ke mutaaliq ihtiyaat ki tawaqqo ki hai kyun ke yeh tahqiqat chhote namonay par mabni thi aur mehdood muddat ki thi. Lekin haali maqalay ne is behas ko dobara taza kar diya hai.

Bari umar ke sabzi khoron ke liye tashweesh

London ke King's College mein ghizaat ke maahir Professor Tom Sanders jaise kuch logon ne in nataij par sawal uthaye hain aur mutanbih kiya hai ke vegan ghiza asal mein boodhon ke liye nuqsandah ho sakti hai aur yeh ke unke liye is mein khatarat barh jaate hain.

Unhon ne BBC ko kaha ke 'boorhay vegans ka patthon ki kamzori, haddioun ki kam kithafat, aasrabi awaard mein mubtala hone ka zyada imkaan hota hai, jis ka miyaar-e-zindagi par numaya asar padta hai.'

Unke mutabiq 'umr daraz sabzi khor kam wazan ke zimmeray mein aate hain. In mein haddioun ke tootne ka khatra bhi zyada hota hai kyun ke kam calcium aur protein ki miqdaar (qudrati tor par dairy aur gosht ki masnoaat mein payi jaati hai) iski mumkinah wajahain hain.'

Professor Sanders ne khabardar kiya ke sabzi khor ghizaon mein bator khaas iron aur zinc ka kam jazb hona ek masla ho sakta hai. Halaanke unka kehna tha ke isko anaj aur phaliyon ke sath sath kaafi phal aur sabziyan khane se kam kiya ja sakta hai.

Professor Sanders ka yeh bhi kehna tha ke jo log sabzi khor ghiza ke sehat ke faiday doosri tarah ki ghiza ke sath muqablay karna chahte hain unke paas bohat zyada daleelain nahi hain.

'Main is haqeeqat par qaem rahoon ga ke vegan aur sabzi khoron (sabzi khoron aur ghair sabzi khoron) ki majmoi sehat bohat mukhtalif nahi hai.'

Britain mein consultant doctor Nyambura Mboro khaas tor par sabzi khor ghiza ke sehat ke faiday ke bare mein fikr mand hain.

Doctor Mboro ghizaat ke maahir hain. Woh apne online blog mein vegan diet ko 'kam ghizaat' wala kehte hain. Is ke bajaye woh khane mein tawazun ko ahmiyat dete hain.

Unhon ne likha ke 'podon aur janwaron par mabni khoraak mein micronutrients ki mukhtalif miqdaar hoti hai aur is liye unhein ghizaat ke musabaqat ke zarayeh ke bajaye ek doosray ki takmeel karne wale ke tor par dekha jana chahiye.'

Vegan ghiza ke faiday

Britain ke doctor Alan Desmond vegan ghiza ke faiday ke bare mein wasee paimane par bolte aur likhte hain. Unke khayal mein omar daraz afrad ko gosht se paak khoraak khane ki targeeb di jani chahiye aur is ke faiday ko nazar andaz karna mushkil hai.

Unka kehna hai ke 'podon par mabni sehat bakhsh khoraak kisi bhi umar mein bohat faida mand hoti hai. Is se dil ki bimari, type 2 diabetes aur kai qisam ke cancer ke khatrey ko kam kiya ja sakta hai, jin ka boorhay mein zyada khudsha hota hai.

'Poday par mabni ghiza ko tabdeel karne ke bare mein sochne mein kabhi bhi jaldi ya der nahi hoti hai.'

Lekin doctor Desmond khabardar karte hain ke gosht aur doodh se paak khoraak par kaarbund boorhay logon ke liye 'ahm ghizai ajza ka khayal rakhnay' ki zaroorat hai.

Woh kehte hain ke 'jo bhi shakhs sehatmand rehne ka irada rakhta hai usse zyada protein wali podon par mabni ghizayein jaise phalian, tofu aur whole grain (pura anaj) khana chahiye. Aur wazan uthaanay ki baqaida mashqon ki bhi unki zaroorat hai.'

Vitamin B12 ek ahm zaroorat hai. Yeh sirf janwaron se padne wali masnoaat mein paya jata hai aur yeh insani ghiza mein ek ahm juzo hai. Maahireen ka kehna hai ke aksar vegan tarz-e-zindagi wale is se mehroom rehte hain.

Vitamin B12 ki kami ki alamat mein thakaawat, patthon ki kamzori, afsurdgi aur uljhan shaamil hain. Yeh alamat bari umar ke logon mein zyada wazeh aur zyada khatarnaak hone ka imkaan hai. Ek tahqiqat mein muhaqiqeen ne vitamin B12 ki kam satah ko faalij ke barhte hue khatrey se munsalik bataya hai.

Choline ek aur ahm ghizaiyat hai jo anday, doodh aur beef yani gaaye aur bhains ke gosht mein zyada miqdaar mein paya jata hai.

Bohat se maahireen ka kehna hai ke sabzi khoron ko is baat ko yaqini banana zaroori hai ke woh choline ko nazar andaz na karein kyun ke yeh asrabi khuliyon ke darmiyan signal ki intiqaal mein madad karta hai aur iska ta'luq gurdon ke achay kaam se hai.

Maahireen ka kehna hai ke choline hamila khawateen ke liye ahm hai kyun ke yeh paida honay wale bachay ki dimaaghi nashonuma ke liye zaroori hai. Khush qismati se yeh brocolli, brussels, sprouts, moong phali aur mushroom jaise khanon mein bhi paya jata hai.

'Nadan Vegan'

Doctor Desmond ne vegan ghiza ke ikhlaqi faiday par bhi roshni daali hain. Woh kehte hain ke 'animal product par inhesaar ko kam karne se carbon ke ikhraaj ko kam kiya ja sakta hai, qudrati wasail ko mehfooz kiya ja sakta hai aur zyada payidaar aur behtar duniya mein apna hissa daala ja sakta hai.'

Tahum boorhay logon ke liye vegan hona hamesha achha option nahi ho sakta. America aur Britain ke maahireen, bohot khaas tor par barhti hui umar ki aabadi mein 'nadani veganism' ke phailao ke bare mein fikrmand hain.

Aur woh isay 'chai aur toast syndrome' kehte hain. Boorhay mareez iron ki kami aur doosray sehat ke challenges ke saath hospitalon mein aate rehte hain kyun ke unki khoraak limited aur kam calories par mabni hoti hai.

Aisa nahi hai ke gosht aur doodh ki masnooat ke istemal mein koi ikhlaqi rukn hai. Shayad iski wajah yeh ho sakti hai ke agar saathi ka inteqal ho jaye aur bachay door chale jayein toh akelay rehte hue khana pakane mein hosla afzai ki kami hoti hai.

Iske ilawa ghizaiyat se bharpoor gosht aur machhli ki masnooat ki zyada qeemat ya gosht, machhli aur doodh ki masnooat khareedne ke liye bazaron ya dukaannon tak jismani tor par janay mein bhi mushkilat hoti hai.

Is majboori ki wajah se ghizaiyat se bharpoor khoraak napid hoti ja rahi hai.

Yeh ek qabil-e-bahas chakkar ho sakta hai. Kuch maahireen ka kehna hai ke yeh syndrome juzwi tor par na sirf maashi aamaal balkay tanhai aur depression ke aaghaz ka nateeja hai. Jaise jaise logon ki umar barhti hai unki jismani sehat aur kamzori par vegan hone ke sangeen asraat nazar aate hain.